የኪንታሮት በሽታን ያለ ቀዶ ጥገና በቤት ውስጥ ለማከም የሚረዱ ሳይንሳዊ መንገዶች

የመቀመጫ ኪንታሮት (Hemorrhoids) በመቀመጫ ወይም በመጸዳጃ አካባቢ የሚገኙ የደም ስሮች ማበጥና መወጠር ሲሆን፣ እጅግ በጣም የተለመደና ብዙ ሰዎችን የሚያጋጥም የጤና ችግር ነው።

---

የኪንታሮት ዓይነቶች

ኪንታሮት በዋናነት በሁለት ይከፈላል፦

• ውስጣዊ ኪንታሮት (Internal Hemorrhoids)፦ አብዛኛውን ጊዜ ህመም የለውም፤ ነገር ግን በሚጸዳዱበት ወቅት በጣም ቀይ የሆነ ደም ሊፈስ ይችላል።
• ውጫዊ ኪንታሮት (External Hemorrhoids)፦ ከፍተኛ ህመም፣ ማሳከክ እና ማበጥ ያለው ሲሆን ታካሚዎችን እጅግ በጣም ያሰቃያል።

---

ለኪንታሮት የሚያጋልጡ ዋና ዋና ምክንያቶች

• በመጸዳጃ ቤት ውስጥ ረጅም ሰዓት መቀመጥ፦ በተለይ ስልክ ይዞ ገብቶ በመጸዳጃ ቤት ላይ ረጅም ሰዓት መቀመጥ የመቀመጫ ደምስሮች ላይ ጫና ስለሚፈጥር ለኪንታሮት ያጋልጣል።
• የሆድ ድርቀት (Constipation) እና ማማጥ፦ በሚጸዳዱበት ወቅት በከፍተኛ ሁኔታ ማማጥ።
• በቂ የፋይበር (Fiber) ምግብ አለመመገብ።
• ከመጠን ያለፈ የሰውነት ክብደት (Obesity)።
• እርግዝና፦ በሆርሞን መለዋወጥ እና በጽንሱ ጫና ምክንያት።
• እድሜ መጨመር፦ የሰውነት ህብረህዋሳት (Tissues) የመለጠጥ አቅም በመቀነሱ።

---

የኪንታሮት ዋና ዋና ምልክቶች

• ቀይ ቀለም ያለው ደም መፍሰስ
• በመቀመጫ አካባቢ ከፍተኛ ማሳከክ እና ህመም
• የመቀመጫ አካባቢ እብጠት
• የሚለጨለጭ ፈሳሽ (Mucus) መውጣት

ማስታወሻ፦ የመቀመጫ ደም መፍሰስ የሌሎች ህመሞችም ምልክት ሊሆን ስለሚችል ወደ ህክምና ቦታ ጎብኝቶ ማረጋገጥ አስፈላጊ ነው።

---

በቤት ውስጥ የሚደረጉ ተፈጥሯዊ ህክምናዎችና መፍትሔዎች

1. የፋይበር ምግቦችን በብዛት መመገብ፦ አትክልት፣ ፍራፍሬ፣ ጥራጥሬ፣ ተልባ እና ሲሊየም ሀስክ (Psyllium Husk) በብዛት መመገብ የሆድ ድርቀትን ይከላከላል።
2. በቂ ውሃ መጠጣት፦ በቀን ቢያንስ እስከ 2.5 ሊትር ውሃ መጠጣት ሰገራ እንዲለሰልስ ይረዳል።
3. የእንፋሎት/የለብ ውሃ ቁጭ ብሎ መዘፍዘፍ (Sitz Bath)፦ ለብ ያለ ውሃ ውስጥ ጥቂት ጨው በመጨመር በቀን 3 ጊዜ ከ10 እስከ 20 ደቂቃ መቀመጥ ህመሙን እና ማሳከኩን በእጅጉ ይቀንሳል።
4. የመጸዳጃ ቤት ልማድን ማስተካከል፦ ስልክ ይዞ ወደ መጸዳጃ ቤት አለመግባት እና ያለአስፈላጊ በኃይል አለማማጥ።
5. ስፖርት እና አካላዊ እንቅስቃሴ ማድረግ፦ ክብደትን ለመቀነስ እና የአንጀት እንቅስቃሴን ለማፋጠን ይረዳል።

---

በአካል የቀረበውን ሙሉ የቪዲዮ ማብራሪያ ከታች ይመልከቱ